Gintawag sang House prosecution team nga ”weakness” sang defense team ang labing una nga testigo nga ginpa-atubang nila sa impeachment trial ni Vice President Sara Duterte bangud sa wala naga-santo sini nga testimoniya.
Ini matapos magtestigo si Davao City assessor kag engineer Jaime Adalin kaangot sang residential lot nga gindeklara ni Duterte sa iya nga 2024 kag 2025 Statement of Assets, Liabilities and Net Worth ukon SALN.
Suno kay House prosecutor Joel Chua, tuman ka butigon ang una nga testigo nga ginkuha sang depensa, ini bangud trying hard pa ini nga depensahan ang iya nga amo apang naga-gwa gid nga wala sang direksyon ang impormasyon nga ginasaysay sini sa trial.
Pahayag pa ni Chua, may kinalain sa balor kag paglaragway sang mga nasambit nga propidad sa Electronic Certificate Authorizing Registration ukon eCAR kag sa SALN sang Bise Presidente.
Naglab-ot sa P6-M ang acquisition cost nga nakabutang sa eCAR, samtang 10-M naman ang gindeklara sa SALN.
Samtang, ginpunto naman ni lead prosecutor Gerville Luistro nga kulang ang land title agud mahibaluan ang nasambit nga propidad nga gindeklara sa SALN bangud lain ang impormasyon sa sulod sang duwa ka dokumento.
Ginkwestyon man ni private prosecutor Benjamin Tolosa Jr. ang konklusyon ni Adalin nga isa lamang ang nasambit nga property, bangud possible may iban pa nga lote sa lugar nga magkapareho ang assessed kag fair market value.
