Nakagwa na sa Pilipinas ang personal assistant ni anay House Speaker Ferdinand Martin Romualdez antes pa man ginpagwa sang Sandiganbayan ang hold departure order batok sa iya.
Ini amo si Joselyn Tragua Serenio nga nalakip sa mga co-accused sang anay House Speaker sa P7.44-billion nga plunder case.
Suno sa Bureau of Immigration (BI), nakabiyahe sa gwa sang pungsod si Serenio antes gin-isyu sang Third Division sang anti-graft court ang order sang Septyembre 7.
Wala naghatag ang BI sang detalye kaangot sa iya pagbiyahe kag dugang nga personal information bangud sa Data Privacy Act.
Samtang, suno sa immigration bureau, nagapabilin pa sa Pilipinas ang isa pa ka co-accused ni Romualdez nga si Felicito Cristobal Guevarra, ang presidente sang Samchan Foreign Exchange Corporation.
Sanday Romualdez, Serenio, Guevarra kag anay House appropriations chair Elizaldy Co ang ginpasakaan sang plunder case nga nagabalor sang P7.44 billion may kaangtanan sa ginaalegar nga kickbacks halin sa anomalous flood control projects nga ginpatuman halin sang 2022 tubtob 2025.
Si Romualdez lamang sa apat ang yara sa kustodiya sang awtoridad sa New Quezon City Jail sa Payatas. Nag-plead na ini sang “not guilty”. Gin-report naman nga didto si Co yara sa Europe kag ginahulat pa ang sabat sang Interpol para sa Red Notice batok sa iya.
Nakakita sang probable cause ang Sandiganbayan batok sa apat ka akusado kag nagrekomendar nga indi sila pagtugutan nga maka-piyansa.
