Gintawag sang Malacañang nga tuman pa ka temprano ang mga kritisismo nga ginahaboy batok sa binilyon ka pesos nga reallocation pakadto sa distrito ni House Majority Leader Sandro Marcos nga anak ni President Ferdinand Marcos Jr.
Ini matapos nga ginpuntariya si Rep. Sandro sang mga grupo nga nagabantay sang paggamit sang pondo sang gobyerno matapos nakit-an sang People’s Budget Coalition nga P4.37 billion sa reallocated funds sa idalom sang proposed 2027 national budget ang nagkadto sa district engineering office sa Ilocos Norte.
Ginpakamalaot man ini ni Caloocan Second District Representative Edgar Erice, nga nagpahayag nga isa ka akto sang “callousness” ang pagbalhin sang binilyon nga piso halin sa mga prayoridad nga proyekto pakadto sa isa lamang ka distrito.
Apang suno kay Communications Undersecretary Claire Castro, indi buot silingon nga ang tanan nga ginduso nga pondo ang maaprubahan kag mahatag na sa mga proyekto.
“Hindi pa po ibig sabihin na na-propose po ito ay ibibigay na po lahat iyong P4 billion or sinumang magbibigay ng kanilang mga proposed projects sa [Department of Public Works and Highways]. Hindi pa po dito natatapos,” suno kay Castro.
Dugang niya, kinahanglan anay nga ipakita sang mga kritiko ang ebidensya nga nagkadto na sa korapsyon ang ginaproponer nga pondo.
Suno sa iya, isa lamang ka tikang sa proseso sang paghimo sang budget ang pag-aprubar sang House of Representatives.
Ginpasiguro man ni Castro nga indi pabor ang Presidente sa pagpadayon sang pagbalhin sang pondo kon wala sang klaro nga detalye kag bastante nga rason ang mga proyekto.
“Hindi maaaring magastos ang pondo sa walang saysay, walang pakinabang na proyekto,” pahayag pa sini.
Ginapanawagan man sang Malacañang sa mga Pilipino nga nagabantay sang budget nga magbulig sa pagmonitor sang posible nga mga iregularidad sa ginaduso nga 2027 national budget.
Nahibaluan nga wala pa gin-aprubahan sang Senado ang ila bersyon sang 2027 national budget kag wala pa man napahibalo sang petsa para sa bicameral conference committee.
Sa amo nga committee iga-reconcile ukon pasibuon ang nanuhay-tuhay nga bersyon sang budget sang House kag Senado antes ini isumiter sa Presidente para sa pinal nga pagpirma.#
