Nangin madinalag-on ang ginpatigayon nga full-scale emergency exercise sang Civil Aviation Authority of the Philippines (CAAP) Area VI sa Iloilo International Airport.
Sa interview sang Bombo Radyo Iloilo kay Engr. Diego Eric Abecendario, Acting Airport kag Area Manager sang CAAP Area VI, iya ginpahayag nga nangin maayo kag madinalag-on ang nasambit nga exercise nga ginapatigayon kada duha ka tuig bilang kabahin sang regulatory standards kag airport certification requirements.
Katuyuan sini nga mahibaluan ang koordinasyon kag kapasidad sang nagkalain-lain nga ahensya sa pagresponde sa tion sang emerhensya.
Ang scenario sa drill amo ang undershoot incident, ukon sitwasyon nga ang eroplano wala nakalab-ot sa runway, nga may sakay nga kapin 145 ka pasahero kag 7 ka crew.
Nagbuylog sa exercise ang 14 ka local government units (LGUs), upod ang mga ambulansya, bombero, imbestigador kag iban pa nga responders.
Suno kay Abecendario, wala sang pass ukon fail nga rating ang drill bangod ang importante amo ang pag-assess sang koordinasyon sang mga ahensya kag ang pag analyze sa mga kakulangan nga kinahanglan pa pasangkaron sa pagresponde sa emerhensya.
By: Bombo Glenette Delit
