Naga-preparar na ang Iloilo City Government sa posibilidad sang water scarcity sa ginapa-abot nga El Niño.
Suno kay GSO Head Engineer Neil Ravena, 25 ka barangay ang na-identify nga mataas ang vulnerability sa kakulangan sang tubig.
Gani, nagapreparar na ang mga departamento sang tagsa ka response plan base sa mga scenario nga ginpresentar sang City Disaster Risk Reduction and Management Office (CDRRMO).
Sa una nga scenario, halin Oktubre tubtob Nobyembre 2026, posible nga magnubo sang 20 tubtob 30 porsyento ang suplay sang tubig, samtang mahimo maglab-ot sa 38 tubtob 41 degrees Celsius ang heat index.
Sa ikaduha nga scenario, sa Disyembre 2026 tubtob Enero 2027, posible nga maglala ang dry spell kag magnubo sang 35 tubtob 50 porsyento ang suplay sang tubig nga mahimo man magpa-untat-untat sang water supply.
Samtang sa ikatatlo nga scenario, sa Pebrero tubtob Marso 2027 ukon mas malawig pa, posible nga maga-atubang ang siyudad sang severe drought, nga may 60 tubtob 80 porsyento nga pagnubo sang suplay sang tubig kag heat index nga mahimo maglab-ot sa 48 degrees Celsius ukon mas mataas pa.
Lakip sa ginapreparar ang pagdeterminar sang General Services Office (GSO) kun pila ka water tanker kag static tank ang kinahanglan sa pagpanagtag sang tubig.
Samtang, nagahanda man ang City Health Office sang mga bulong kag iban pa nga kinahanglanon agud malikawan ang posible nga mga balatian bangud sa water scarcity.
Nagpanugyan man si Mayor Raisa Treñas nga dapat siguraduhon ang padayon nga suplay sang safe nga tubig-ilimnon agud malikawan ang dugang nga problema sa ikaayong lawas bangud sa kontaminado nga tubig.
Sa subong, padayon ang close monitoring sa sitwasyon kag ginahulat ang assessment sang CDRRMO antes magdesisyon kon kinahanglan na ang pagdeklara sang state of calamity.
Ginpahayag man nga may yara na sang pondo para sa prevention, mitigation kag preparedness, apang ang paggamit sang disaster fund para sa response nagakinahanglan sang nagakaigo nga deklarasyon.
