Nagguwa sa report sang tech giant nga Microsoft nga nagapang-lima ang Pilipinas sa mga pungsod nga masami nga ginapuntariya sang Chinese state-sponsored cyber operations.
Gindetalye sa Digital Defense Report 2026 ang ila natukiban nga hacking and digital operations kun sa diin involved ang China, Iran, North Korea, kag Russia.
Sa amo man nga report, ika-pulo naman sa listahan sang targets sang North Korea ang Pilipinas kag ika-dose naman sa kabug-usan nga gina-target sang cyber threats.
Dugang pa sang report, nagapangawat sang datos ang iban nga pungsod halin sa masangkad nga sahi sang targets bangud ginasuportahan sini ang katuyuan sang gobyerno sang ila kaugalingon nga nasyon.
Ang United States of America amo naman ang pinakauna sa listahan nga gina-target sang China, ginasundan sang Taiwan, Japan, Hongkong, kag ang Pilipinas nga nagakumpleto sang top 5.
Dugang man sa iban nga target nga pungsod amo ang Malaysia, Italy, United Kingdom, Germany kag Belgium.
Nakabulig man sa kapasidad sang pagpangawat sang mga cyber actors ang Artificial Intelligence (AI) kun sa diin nagahatag ini sang pamaagi para panghimuslan ang datos sang mga computer systems.
Kaangot diri, nagpaandam ang Armed Forces of the Philippines (AFP) sa publiko natuhoy sa Chinese cyber operations sa pungsod sa subong nga tuig samtang nagadugang ang tensyon sa tunga sang China kag Pilipinas bangud sa West Philippine Sea.
