Nagpositibo sa drug test ang lima ka indibidwal, lakip ang isa ka anay police officer kag isa ka seaman nga nadakpan sa drug buy-bust operation sa Barangay Cahaguichican, Pototan, Iloilo, hapon sang Oktubre 14.
Nakuha sa mga suspek ang 415 grams nga suspected shabu nga may Standard Drug Price (SDP) nga masobra ₱2.8 milyon.
Ginkilala ang mga arestado nga sanday alyas Garry, 46-anyos; alyas Rolly, 47-anyos; alyas Bert , 48-anyos; kag alyas Warren , 23-anyos, nga lunsay residente sang nasambit nga barangay; kag alyas Arnick, 37-anyos, nga residente sang Barangay Cabalabaguan, Mina, Iloilo.
Sa interview sang Bombo Radyo kay Pcapt.Ryan Batadlan, deputy chief of police sang Regional Police Drug Enforcement Unit, iya ginpahayag nga duha sa lima ka mga arestado ang ginakabig nga High Value Individuals (HVI), samtang tatlo ang Street-Level Individuals (SLI).
Detained na ang lima ka mga suspek sa Pototan Municipal Police Station.
Napasakaan naman sang kaso ang apat sa mga suspek bangud sa paglapas sa Republic Act 9165 ukon Comprehensive Dangerous Drugs Act of 2002, samtang Obstruction of Justice naman ang ginpasaka batok sa seaman.
