Ginmanduan ni President Ferdinand Marcos Jr. ang mga ahensya sang gobyerno nga maghanda sa worst-case scenario bangud posibilidad nga halos tanan nga probinsya sa pungsod makaeksperyensya sang drought bangud sa nagahilapit nga “Super El Niño.”
Ginpaguwa ni Marcos ang direktiba sa iya meeting kaupod ang mga opisyal sang Department of Environment and Natural Resources, Department of Agriculture, Department of Science and Technology kag Philippine Atmospheric, Geophysical and Astronomical Services Administration.
Suno kay Science Secretary Renato Solidum, posible nga tanan nga probinsya makaeksperyensya sang drought sa katapusan sang Marso 2027, apang mahimo nga maglain-lain ang kabaskugon sini depende sa kadamuon sang ulan sa tagsa ka lugar.
Ginpahayag ni Solidum nga may mga probinsya nga mahimo maka-eksperyensya sang mas mabaskog nga drought condition sa masunod nga mga bulan samtang ang iban nga lugar mahimo nga maapektuhan sang mas ulihi.
Samtang, ginpahayag naman ni Environment Secretary Juan Miguel Cuna nga wala ginhisugtan sa meeting ang posible nga pagdeklarar sang climate emergency.
Suno kay Cuna, ang importante nga direktiba ni Marcos amo ang pagpanghanda sang mga ahensya sang gobyerno kag nagkalain-lain nga sektor sa worst-case scenario, agud mangin handa sila kon matabo ang drought conditions.
Kabahin man sa pagpanghanda sang DENR ang pagbalik sang water conservation campaign bangud ginpabutyag sini nga ang tanan may papel sa pagprotektar sang suplay sang tubig sa pungsod.
Gin-enggangyo sini ang publiko nga likawan ang indi kinahanglanon nga paggamit sang tubig lakip ang sobra nga paggamit sini sa paghugas sang salakyan, paglimpyo sang driveway, kag iban pa nga indi importante nga aktibidad.
Samtang, ginapadali man sang Department of Public Works and Highways ukon DPWH ang konstruksyon sang mga imprastraktura para sa stormwater harvesting nga makabulig sa pagkinot sang tubig kag sa flood mitigation kag disaster resilience.
Base sa October 2026 tubtob March 2027 outlook sang DOST, mahimo nga magsugod ang drought sa pila ka lugar nga mas temprano pa sa Oktubre kag magpadayon tubtob sa katapusan nga semana sang Marso sa masunod nga tuig.#
