Nagpangabay ang defense team ni anay Presidente Rodrigo Duterte sa International Criminal Court (ICC) nga indi pagbatunon ang testimonya sang nagapanguna nga witness sang prosekusyon.
Suno pa sa ila nga wala napamatud-an sang mga prosecutor nga indi mahimo nga magtestigo ang ila testigo.
Suno pa sa depensa, indi man masaligan ang mga pahayag sang nasambit nga testigo, gani mangin indi patas ini sa mga akusado.
Sa petisyon nga ginpasaka sang Nobyembre 18, ginpangabay sang depensa sa ICC Trial Chamber nga indi pagbatunon ang pangabay sang prosekusyon nga ilakip bilang ebidensya ang mga pahayag sang testigo nga si P-0002, nga isa sa mga masami nga ginasaligan nga source sang prosekusyon sa kaso batok kay Duterte.
Ginkuwestiyon man sang depensa ang dugang nga pangabay sang prosekusyon nga indi makahatag sang direkta nga testimonya si P-0002.
Suno sa ila, nagasalig lamang ang testigo sa impormasyon nga ginahatag sa iya sang pila ka indibidwal sang nagligad nga tuig, nga wala man sang bisan ano nga dokumento nga ginpresentar bilang ebidensya.
Dugang pa sang depensa, una nga ginpahayag sang mga prosecutor nga ang testimonya sang testigo mahimo nga magpresentar sang bag-o nga proseso, antes nila gin-ako nga lain ang ginapahayag sang nasambit nga probisyon sang Rome Statute.
Ginkuwestiyon man sang depensa ang kredibilidad sang testigo bangud nagalain-lain ang iya mga pahayag.
Ginapasibangod sa anay Presidente nga siya ang responsable sa mga nagkalatabo nga pagpatay may kaangtanan sa iya kampanya kontra sa ilegal nga droga.
Nahibaluan nga sa Nobyembre 30 padayunon na ang trial, kag ginapaabot nga lima ka testigo sang prosekusyon ang una nga ipatawag.
Magasugod naman ang ila winter break sa Disyembre 18.














