Gin-athag sang isa ka human rights lawyer nga wala sang dako nga epekto sa ginapangatubang nga kaso ni anay presidente Rodrigo Duterte sa International Criminal Court (ICC) ang tingob nga pagkontra sa ng United States, China kag Russia sa hurisdiksyon sang nasambit nga korte.

Ini ang kasunod sang gin-isyu nga Declaration Toward Peace sang tatlo ka lideres nga sanday U.S President Donald Trump, Chinese President Xi Jin Ping kag Russian President Vladimir Putin matapos ang ila nga trilateral meeting sa Shenzhen, China, kun sa diin gin-insister sang mga ini nga indi dapat pag-abusuhon sang ICC ang gahum sini kag dapat irespeto ang immunity sang mga opisyal sang estado.

Sa interview sang Bombo Radyo kay Atty. Jobert Pahilga, human rights lawyer, iya ginpahayag nga wala man nagpanawagan ang tatlo ka lideres nga dalayon na nga bungkaon ang ICC gani wala sang basehan agud hambalon nga untaton ukon suspendihon ang mga kaso nga ginapaidalom sa trial.

Ginsiling man niya nga makatuhay ang isyu sa pagkontra sang mga lider sa hurisdiksyon sang korte kag ang legal nga proseso sa kaso nga ginapangatubang ni Duterte.

Bangud diri, gin-athag sang abogado nga wala nagakahulugan ang nasambit nga deklarasyon nga mahilway na si Duterte gikan sa kustodiya sang ICC ukon madulaan na sang gahom ang mga kaso nga ginaatubang niya.

Sa pihak nga bahin, nagpaandam man si Pahilga nga mahimo nga paluyahon sang pagpamalabag sang tatlo ka mga pungsod sa International Criminal Court (ICC) ang pagpatuman sang internasyonal nga hustisya, partikular sa mga kaso nga may kaangtanan sa paglapas sa tawhanon nga kinamatarung kag krimen batok sa katawhan.

Ginpaathag ni Pahilga nga may dako nga impluwensya ang tatlo ka pungsod bangud kalakip ang mga ini sa lima ka permanente nga miyembro sang United Nations Security Council (UNSC).

Suno pa sa abogado, mahimo nga maapektuhan ang pagpatuman sang mga desisyon sang ICC kun indi pagsuportahan sang mga gamhanan nga pungsod ang mga ini ilabi na kun gamiton nila ang ila impluwensya sa politika, ekonomiya kag seguridad sang iban nga mga estado.