Pilason ang isa ka 40-anyos nga lalaki sa Barangay Magdalo, Banate, Iloilo matapos nga ginluthang kag ginbuno sang isa man ka lalaki samtang yara sila sa tunga sang dalan.

Ang biktima amo si alyas Ninoy samtang ang suspek naman amo si alyas Jun, 35-anyos, nga pareho residente sang Barangay De la Paz sa amo nga banwa.

Pilas sa liog ang naangkon ni Ninoy matapos nga gintiro kag nasamaran pa gid sa kamot kag dughan matapos ginbuno.

Sa interview sang Bombo Radyo kay Police Lieutenant Ma. Cherry Demarana, Officer in Charge sang Banate Municipal Police Station, iya ginpahayag nga antes ang insidente, nagsumalangay ang duha samtang nagasakay ang biktima sa iya salakyan kag nagasakay naman ang suspek sa motorsiklo.

Suno sa pulis, sandig sa pahayag sang suspek, nagtulukay sila sang biktima kag ginbuyayaw siya sini, rason nga natabo ang insidente. Apang, suno kay Demarana, posible nga may daan na nga indi paghangpanay ang duha base sa ila inisyal nga imbestigasyon.

Nalagyo pa ang suspek pagkatapos sang insidente apang nadakpan man sang kapulisan pasado alas 10 sang aga. Sa subong, yara na siya sa kustodiya sang Banate MPS.

Padayon naman nga ginabulong sa Western Visayas Medical Center ang biktima kag yara na sa estable nga kondisyon.

Ginahulat pa sang kapulisan ang desisyon sang biktima kun magapasaka ini sang kaso batok sa suspek.# (By: Bombo Ireca Faye Pioquinto)