Nakuhaan sang drug paraphernalia ang isa ka pasahero sa port sa Dumangas Iloilo.
Sa interview sang Bombo Radyo kay Police Major Kenn Albert Lepsia, ang Chief of Police sang Dumangas police station, iya gin pahayag nga tungod sa competence sang port police sa Ro-Ro terminal sa Dumangas, natigayon nga madakpan ang isa ka indibidwal nga may dala nga tooter nga gina bawal sa RA 9165.
Ang lalaki ang ginkilala kay Alyas Marvin, 28 anyos, wala sang asawa kag residente sang Antique.
Ginpahayag man ni Lepsia nga pasado 1:30 subong nga hapon, natigayon nga makit an ang ini nga paraphernalia sa bag sang isa ka pasahero tungod man sa standard operating proceedure nga ginhimo sa port kung sa diin gina bukad ang bag sang mga pasahero.
Dugang niya nga sang ginbuksan ang bag sang ini nga indibidwal, gilayon nga nakit an ang suludlan sang nasambit nga tooter gani nga gilayon ini sya gin aresto.
Sa subong, gina preparar naman ang mga papeles agud mapatigayon ang inquest proceeding may kaangtanan sa ini nga insidente.
Ginapahayag nga padulong sa Bacolod ang ini nga indibidwal sang sya ang nadakpan, kag sa subong ara na ini sa kustudiya sang Dumangas Municipal Police Station.
Ginpahayag man ni Lepsia nga humalin sang October 10, may na rekord na nga 10 apprehension sa nasambit nga port may kaangtan sa mga ginabawal nga kargamento.
Text by: Bombo Ireca Pioquinto
