Arestado ang isa ka lalaki samtang dakop naman duha ka menor de edad matapos gina-alegar nga nanghurikap sang private part sang isa ka estudyante sa Jalandoni, City Proper kahapon nga adlaw, Nobyembre 17.
Ginhinago ang mga suspek kanday Alyas Boy, 21-anyos; alyas Toto, 17-anyos kag Nonoy, 15-anyos, lunsay mga residente sang Roxas, Capiz,
Sa interview sang Bombo Radyo kay PCapt. Melchor Tolentino, hepe sang Iloilo City Police Station 1, iya ginpahayag nga padulong sa eskwelahan ang estudyante nga biktima sang gulpyada lang ginkaptan sang duha ka menor de edad ang duha sini ka mga kamot.
Pagkatapos sini, ginapahayag nga gilayon ginhurikap ni alyas Boy ang private part sang biktima.
Suno kay PCapt. Tolentino, gilayon man nga nagpalagyo ang mga suspek matapos sang mga ini ginhurikap ang biktima.
Apang, gilayon man ang mga ini nga nga nadakpan bangud sa malapit nga presensya sang katapo sang Iloilo City Traffic and Transportation Management Office (ICTTMO), security guards kag gilayon man gin-turn over sa mga kapulisan.
Pahayag pa sang hepe, yara sa subong sa kustodiya sang ICPS 1 ang suspek nga legal ang edad kag posible nga magapangatubang sang kaso nga Acts of lasciviousness.
Samtang, ang duha ka menor de edad ang yara sa kustodiya sang Women and Children Protection Desk.
Dugang pa ni PCapt. Tolentino, base sa ila imbestigasyon, pangayaw lamang ang mga suspek kag wala sang permanente nga address sa syudad sang Iloilo.










