Opisyal na nga ginbaton sang Singapore ang pagpanguna sa Association of Southeast Asian Nations (ASEAN) para sa tuig 2027 matapos gintugyan ni President Ferdinand Marcos Jr. kay Singapore Prime Minister Lawrence Wong ang simbolo sang liderato sa closing ceremony sang ASEAN Summit and Related Summits 2026.

Sa nangin mensahe ni Singapore Prime Minister Wong, gindayaw sini ang Pilipinas sa pagpanguna sa ASEAN subong nga tuig, kag ginpahayag nga nagpabilin nga nagahiusa ang mga pungsod sa ASEAN kag nagpadayon sa pag-uswag apisar sang mga pagsulay nga gina-atubang sang kalibutan.

Sa idalom sang pagpanguna sang Singapore, pagagamiton ang tema nga Deeper Integration and Wider Partnership, nga nagatuyo nga mapabakod ang pagbinuligay sang mga miyembro sang ASEAN kag iban pa nga partner countries.

Gindugang ni Wong nga padayon sila nga magahimo sang maayo nga relasyon sa iban nga pungsod agud magpabilin ang Southeast Asia bilang rehiyon nga bukas sa pagbinuligay kag kooperasyon.