Nagpatigayon sang mobilisasyon ang nagkalain-lain nga progresibo nga grupo kag sektor sa Iloilo agud ipahayag ang ila pagpamatok sa pag-abot ni United States President Donald Trump sa Pilipinas para sa 49th ASEAN Summit.
Sa interview sang Bombo Radyo kay Elmer Forro, secretary general sang Bagong Alyansang Makabayan (BAYAN) Panay, iya ginpahayag nga indi welcome sa pungsod si Trump bangud sa mga polisa sini nga suno sa iya nagapalala sang krisis sa ekonomiya kag nagadala sang negatibo nga epekto sa palangabuhian sang mga Pilipino.
Gintudlo man ni Forro ang mga polisa kag tikang sang administrasyon ni Trump bilang isa sa mga rason sa pagsaka sang presyo sang petrolyo kag iban pa nga balaklon, subong man ang pagluya sang balor sang piso kontra dolyar.
Ginpabutyag man sini nga indi mapunggan sang ginapatihan nga pagpamahog kag pagpamigos ang mga pumuluyo, ilabi na ang mga pamatan-on, sa pagpahayag sang ila pagsupak sa mga polisa sang gobyerno kag presensya ni Trump sa pungsod.
Pasado alas dos sang hapon sang nagtipon ang mga grupo kag estudyante antes nagpatigayon sang martsa nga nagtapos sa Iloilo Provincial Capitol sang mga alas-3 sang hapon.
Nagpatigayon man sang class walkout ang mga estudyante halin sa nagkalain-lain nga state universities and colleges sa Iloilo City kag nagtipon sa atubang sa amo nga venue nga kadungan sang National Students’ Day.
Bitbit ang mga placard nga may mensahe nga “Trump Out Now”, ginpabutyag sang mga pamatan-on ang ila panawagan para sa kaayuhan sang mga estudyante kag ang pagsulbar sa mas masangkad nga mga isyu sa pungsod.
Lakip sa mga isyu nga ginapabutyag sang mga grupo ang kakulang sang pondo para sa edukasyon, indi bastante nga mga pasilidad sa mga eskwelahan, korapsyon kag ang pagpamahog sa soberanya sang pungsod.#













