Gin-athag ni Punong Barangay Elfren Cenayo sang Don Esteban, Lapuz, Iloilo City nga gindangop na niya sa Iloilo City Government ang problema sa nagadanaw nga dalan sa ila lugar.
Ini matapos nagpa-Bombo ang pila ka mga residente bangud sa huol nga dulot sang nagadanaw nga dalan bisan wala na nagaulan.
Sa interview sang Bombo Radyo kay Cenayo, iya ginpahayag nga nakapalapit na siya kay Mayor Raisa Treñas agud mangayo sang bulig.
Suno kay Cenayo, sa pagkamatuod, nakapatigayon na sang declogging sa area kag naglawig pa gani sang duwa ka adlaw nga ginpasuyupan ang tubig apang nagbalik gihapon ang danaw pagkasunod nga adlaw.
Gintudlo naman sini ang ginpatindog nga mga bodega nga amo ang rason sang pagdanaw sa ila lugar.
Suno sa iya, gintampukan sang duta ang mga fishpond sadto agud tukuran sang mga bodega gani ang tubig nga halin sa La Paz ang nagabuslog sa ila kag wala sang mailigan.
Nagpabutyag naman ini sang pagkadismaya sa iban nga mga pumuluyo nga nagreklamo bangud suno sa iya, ginaplastar man niya ini sa tion sang barangay assembly kag ang mga nagreklamo ang posible wala nagatambong kun may pagsinapol sa barangay.














