Gin-engganyo sang Bureau of Fisheries and Aquatic Resources (BFAR) ang mga fishpond operators nga mag-harvest na sang ila mga isda antes maglala ang epekto sang Super El Niño kag temporaryo nga untaton ang pagpasulod sang bag-o nga stocks agud malikawan ang daku nga kapierdehan.

Ini kaangot sa posibilidad sang matabo nga fish kill, pagnubo sang kadamuon sang mga isda nga mahulik, kag epekto sa palangabuhian sang mga manugpangisda sa Western Visayas bangud sa ginapaabot nga mabaskog tubtob sa tuman kabaskog nga El Niño nga posible magpadayon sa una nga bahin sang 2027.

Sa interview sang Bombo Radyo kay BFAR-6 Regional Director Remia Aparri, iya ginpahayag nga importante nga makahanda na ang mga fishpond operators samtang may yara pa sang bastante nga suplay sang tubig, bangud posible nga magkulang ini sa masunod nga mga bulan, ilabi na sa Enero tubtob Marso sang 2027.

Ginpahanumdom sini ang mga fishpond operators nga kun mahimo, indi anay mag-stock sang isda halin subong tubtob sa first quarter sang 2027, depende sa sitwasyon sang ila water sources, agud malikawan nga mapatay ang mga isda bangud sa kakulang sang tubig.

Samtang, ginpaandaman man sang BFAR ang mga manugpangisda nga maggamit sang proper protective equipment kag likawan ang malawig nga pagpabilin sa idalom sang init sang adlaw agud malikawan ang heat stroke kag iban pa nga balatian.

Dugang pa diri, ginpanawagan man ang mga fisherfolk nga amligan ang coastal resources pareho sang mangroves, coral reefs kag seagrasses, bangud importante ini sa paghatag sang proteksyon kag pagpadayon sang kabuhi sa kadagatan.

Ginpahayag man ni Aparri nga padayon ang pag-monitor sang BFAR sa water parameters sa mga fishpond kag marine environment, lakip na ang paghatag sang impormasyon sa mga apektado nga sektor.

Ginalantaw man sang ahensya ang pagpauswag sang iban pa nga palangabuhian pareho sang seaweed farming, nga mahimo mangin oportunidad sa mga manugpangisda samtang nagaatubang sa epekto sang El Niño.#