Ginalantaw sang mga local hog raisers sa Iloilo nga indi bastante nga solusyon sa ginapangatubang nga problema sa ila sector ang duwa ka bulan nga pag-ban sang imported nga baboy.
Nahibaluan nga nag-isyu sang Department Order No. 33, Series of 2026 ang Department of Agriculture (DA) nga nagapatuman sang 60-day temporary suspension sang importasyon sang pork products pasulod sa Pilipinas bilang tikang agud protektahan ang local industry.
Sa interview sang Bombo Radyo kay Iloilo 2nd District Board Member Rolito Cajilig, Chairman sang Committee on Agriculture sa Sangguniang Panlalawigan, iya ginpahayag nga bisan gin-untat ang importasyon sang baboy kun barato gihapon ang farmgate price, mamierdehan gihapon ang mga local hog raisers.
Suno kay Cajilig, isa man sa problema amo nga wala gin-aprubahan sang Department of Agriculture ang hingyo sang probinsya nga pagpatuman sang duwa ka bulan temporary ban sa entry sang live hogs kag pork halin sa gwa sang probinsya umpisa kuntani sa Nobyembre 1 tubtob Disyembre 31, 2026.
Pahayag ni Cajilig, tuman ka bastante ang supply sang baboy sa Iloilo kun sa diin yara sa malapit 90% ang sufficiency rate gani indi kinahanglan sang suplay halin sa iban nga probinsya.
Nagapanawagan si Cajilig nga kuntani mapataas man ang farmgate price agud indi makabawi-bawi man ang local hog raisers sa ila gasto ilabi na nga nagamahal man ang feeds kag iban pa nga kinahanglanon para sa pagsagod sang baboy.














