Gina-updan sang Paghugpong sang mga Mangunguma sa Panay kag Guimaras (PAMANGGAS) ang panawagan nga pasakaon ang farmgate price sang baboy agud indi man matam-an sa kapierdehan ang hog raisers.
Kasunod ini sang pag-agunto sang backyard hog raisers partikular sa Panay nga nagabaton sila sang P130-150 gid lamang kada kilo nga bayad para sa buhi nga baboy, apang pag-abot naman sa merkado, nagapalangkaak na ang presyo sang karne.
Sa interview sang Bombo Radyo kay Lucia Capaducio, chairperson sang PAMANGGAS, iya ginpahayag nga nagapanawagan sila nga pasakaan bisan gamay ang presyo sang buhi nga baboy pakadto sa P180 kada kilo ilabi na bangud wala naganubo sa P2,000 ang feeds.
Sa subong suno sa iya, ang masami nga presyo sang buhi nga baboy nagadangat lang sa P130-150 kada kilo, apang pag-abot sa local markets, nagatupa na ang presyo sa P230-240 kada kilo ukon nagalapaw pa sa P300.
Ginatudlo sini nga rason sa amo nga problema ang pagbaha sang imports indi lamang halin sa iban nga probinsya kundi sa iban nga nasyon.
Lakip sa gin-apelar sini amo ang pag-untat sang importasyon ilabi na kun bastante man ang produksyon kag kun indi man kinahanglanon.
Nahibaluan nga sa bahin sang probinsya sang Iloilo, may petition nga ginpasaka ang Leon Hog Farmers Association (LEHFA) kay Iloilo Governor Arthur Defensor Jr. nga maghulag na sang insigida ang gobyerno agud masabat ang tuman ang problema sa tuman ka nubo nga farmgate prices kag mataas naman nga production costs, ilabi na bangud ang nagalala nga sitwasyon ang nagabutang sang ila palangabuhian sa risgo, kag ginalantaw man nga mabutang sa alang-alang ang sustainability sang local swine industry.
Nag-adoptar naman ang Sangguniang Panlalawigan sang resolution nga nagapanawagan sa Department of Agriculture (DA) nga ikonsiderar ang duha ka bulan nga temporary ban sa pagsulod sang buhi nga baboy amo man sang karne nga halin sa gwa sang probinsya, halin sa Nobyembre 1 tubtub sa Disyembre 31, 2026.
