Ginsentensyahan sang Mombasa High Court sa Kenya sang 200 ka tuig nga pagkapreso ang lider sang kulto nga si Paul Mackenzie.
Ini bangud sa kamatayon sang 190 ka kabataan nga gin-alegar nga iya ginmanduan nga pagutman tubtob nga mapatay agud makasaka sa langit.
Suno sa mga Prosecutor, ginpwersa kag ginpahog man sang iya mga kaupdanan ang mga sumulunod nga magpuasa, lakip na ang ila mga kabataan.
Kaupod ni Mackenzie ang 28 ka indibidwal nga ginsentensyahan man sang pagkapreso nga naga-lab-ot halin sa 10 tubtob 160 ka tuig.
Nagsugod ang pagkadiskubre sang mga biktima sang Abril 2023 sa Shakahola Forest, kun sa diin 448 ka bangkay ang nakit-an kag ginabanta magalab-ot sa 500 ang kabug-usan nga kadamuon sang mga napatay.
Ginpanginwala ni Mackenzie ang mga kaso batok sa iya, apang wala ginbaton sang korte ang iya depensa kag ginpahayag sang iya abogado nga ila ini iga-apelar.
