Patay ang driver sang motorsiklo samtang pilason naman ang iya 18-anyos nga bata matapos nga nagbungguanay ang ila ginasakyan nga motorsiklo kag ambulansya sang Local Government Unit (LGU) sang San Dionisio sa Barangay Licuan, Barotac Nuevo, Iloilo, las-2:15 sang kaagahon, Nobyembre 16, 2026.

Ginkilala ang napatay kay alyas Jerry, 42-anyos, samtang ang iya angkas nga bata amo si alyas Javes, 18-anyos. Lunsay residente ang duha sang Barangay Merced, Banate, Iloilo.

Samtang ang driver sang ambulansya ginkilala kay alyas John, 32-anyos, residente sang Barotac Viejo.

Sa interview sang Bombo Radyo kay PCapt. Francis John Layog, hepe sang Barotac Nuevo Municipal Police Station, iya ginpahayag nga halin sa Pavia kag pakadto sa Banate ang motorsiklo sang nagluntad ang aksidente.

Base naman sa panaysayon sang driver sang ambulansya, nag-overtake siya sa isa ka motorsiklo sa unahan kag naglapaw sa pihak nga lane, rason nga nagbungguanay ang duha ka salakyan.

Bangud sa mabaskog nga impact, nakaagom sang pilas sa ulo ang driver sang motorsiklo, nga wala nagasuksok sang helmet sang natabo ang aksidente.

Gindala pa sa ospital ang driver apang gin-deklarar ini nga dead-on-arrival.

Samtang padayon naman nga ginabulong sa ospital ang iya bata nga si alyas Javes.

Suno pa kay Layog, gin-release na ang driver sang ambulansya matapos mag-expire ang 18-hour reglementary period of detention.