Patay ang 30-anyos nga construction worker matapos ginbuno sang kutsilyo sang iya kaupod nga nagainom sa Barangay Pagaypay, Passi City, pasado alas-12:00 sang kaagahon, Oktubre 18.
Ginkilala ang biktima kay alyas Jesery, single kag residente sang nasambit nga barangay, samtang ang suspek amo si alyas Jur, 35-anyos, kasado kag residente sang Barangay Malag-it Grande, Passi City.
Suno sa Passi City Police Station, nagainom sang makahulubog nga ilimnon ang duha ka lalaki sa brgy. Pagaypay sang nagluntad ang baisay ukon indi pag-intindihanay sa tunga nila.
Bangud sini, ginbuno sang suspek ang biktima antes gilayon nga nagpalagyo sa lugar.
Gindala pa ang biktima sa Don Valerio Palmares Sr. Memorial District Hospital, apang gin-deklarar ini nga dead on arrival.
Samtang, nagsungka man sa kapulisan ang suspek kag yara na karon sa kustodiya sang Passi City Municipal Police Station.
Posible nga pasakaan sang kaso nga homicide ang suspek may kaangtanan sa insidente.
Text by: Bombo Jay Panizales
