Sa tanan nga kalisod kag pagpanghangkat sa kabuhi sang isa ka estudyante nga nagaserbe man bilang cadet officer sang Passi City College Reserve Officers’ Training Corps (ROTC Unit), wala ini nakapugong sa iya agud nga magpadayon sa paglab-ot sang iya nga mga handum.
Ini amo si Cadet Lieutenant Colonel Reymark A. Adame, residente sang Nueva Union, Passi City, kag graduating fourth-year Bachelor of Science in Criminology student sang nasambit nga kolehiyo, nangin Top 1 man ini sa ila Basic Cadet Training.
Isa man ini ka myembro sang student organization nga amo ang 4-H Club, nangin presidente man sang ila nga classroom kag nagserbe man bilang senator sang Student Government sa tuig 2025 -2026.
Sa iya padayon nga pagpakita sang abilidad sa pagpanguna kag pagserbisyo, nangin isa man siya sa siyam ka cadets sang Armed Forces of the Philippines nga napilian nga magrepresentar sa Pilipinas sa Reserve Officers’ Training Corps – Leadership Exchange and Alliance Development (ROTC-LEAD) nga ginhiwat sa Guam, United State of America, sang Nobyembre 11 tubtob 16, 2026, kun sa diin siya ang isa sa tatlo ka Army cadets nga nagrepresentar sa Visayas.
Sa interview sang Bombo Radyo kay Cadet Lieutenant Colonel Adame, iya ginpahayag nga indi malikawan ang kakapoy kag pressure sa iya bilang cadet officer, ilabi na sa pagbalanse sang iya pagtuon kag mga responsibilidad sa ROTC.
Suno sa iya, kinahanglan niya mapabilin ang grado nga indi magnubo sa 90 porsyento para sa iya nga scholarship, samtang ginatuman man ang mga reporting kag buluhaton nga ginakinahanglan sang ila unit.
Pahayag pa niya, may mga tion man nga naghunahuna siya nga mag-untat na lang, apang nangin daku nga inspirasyon ang suporta kag paggiya sang iya mga instructors, ilabi na ni PCC President Dr. Janice Jennifer Palmares, agud magpadayon.
Ginpahayag man niya nga ang disiplina nga iya natun-an sa ROTC, amo ang isa sa mga nakabulig sa iya nga mabalansi ang pagtuon kag ang iya mga katungdanan bilang cadet officer.
Ginpakigbahin man ni Adame nga ang ROTC indi lamang nagasentro sa military training, kundi nagahatag man sang oportunidad sa mga cadets nga mangin aktibo sa pagserbisyo sa komunidad lakip ang community engagement, security augmentation, kag boluntaryo nga pagbulig sa nagkalain-lain nga aktibidad nga nagahatag benepisyo sa publiko.
Ang iya anum ka adlaw nga eksperyensya sa ROTC-LEAD sa Guam, USA, ang nangin oportunidad man agud mas mapauswag ang iya leadership skills, time management, kag communication skills.
Natun-an man sini ang importansya sang pagpaambit sang husto nga impormasyon sa iya grupo kag maayo nga komunikasyon, ilabi na sa paghatag sang mga pahibalo sa ila mga squad leader kag miyembro agud malikawan ang peligro kag mapabilin ang kaluwasan sang ila grupo.
Plano sa karun ni Adame nga makasulod sa Armed Forces of the Philippines (AFP), agud magamit ang mga natun-an kag mabalik ang pribilehiyo nga ginhatag siya sang siya ang isa pa lamang ka kadete, paagi sa pagserbisyo sa pungsod kag pagsiguro nga maprotektahan ang soberanya sang Pilipinas.
Dugang pa ni Adame, ginpabug-atan niya nga mas importante ang mabakod nga paminsaron kaysa sa pisikal nga kusog, bangud ang mga paghangkat sa kabuhi kinahanglan atubangon paagi sa disiplina, malawig nga pasensya, kag husto nga pagdesisyon.
Suno pa sa iya, ang kada eksperyensya kag kabudlayan nga iya naagyan nangin leksyon nga nakabulig sa paghulma sang iya karakter kag pagpalig-on sang iya kaugalingon.
Ginpaathag man niya nga dapat hunahunaon sang maayo ang desisyon nga magahimuon agud malikawan ang posible nga mga problema.
Ginpasalamatan man sini ang iya pamilya, mga abyan, instructor kag iban pa nga nagbulig sa iya agud nga malab-ot ang iya mga handum.














