Gindala pauli sang isa ka estudyante nagikan sa West Visayas State University-College of Arts and Sciences ang naga-isahanon nga Gold Award sa Independent Innovator Category sang 2026 Idlab Awards.

Ini amo si Sheenlou Eian Bartolome nga isa ka senior Chemistry student nga tumandok man sang Miag-ao, Iloilo, kag ginakabig nga youngest awardee sa prestihiyoso nga recognition sa patag sang Regional Research, Development, and Innovation bangud sa iya 18 documented research projects and innovations.

Sa interview sang Bombo Radyo kay Bartolome, iya ginpahayag nga nagsugod lang ang iya interes sa Science sang sya ang nangin Senior Highschool student sa idalom san Science, Technology, Engineering, and Mathematics (STEM) Strand.

Suno sa iya, didto sya nangin mas passionate sa pagpadayun sa nasambit nga mga pagtuon bangud man sa ila nga nangin proyekto.

Pahayag man ni Bartolome, isa gid ka dako nga bagay sa iya ang nabatun sini nga award kaupod ang mga ginatangla na niya nga mga propesyonal, researchers, scientists, kag innovators sang Western Visayas.

Nagapasalamat man ini sa plataporma nga ginhatag sang Department of Science and Technology agud mahatagan sang importansya ang mga proyekto kag pagtuon ilabi na sang kaangay niya nga young reasercher.

Apang suno man kay Bartolome nga magluwas sa mga nabatun niya nga mga achievements, nakababulig man sya sa paghulma sang mas ginapasangkad nga scientific future sang rehiyon.