Gindala sang alumnus sang West Visayas State University (WVSU) ang talento sang isa ka Ilonggo sa international stage sang napilian ini nga mangin kabahin sang “Legally Blonde: The Musical” sa Thailand.
Ini amo si Francis Cabinos, tumandok sang Leon, Iloilo, kag produkto sang Bachelor of Culture and Arts Education sa WVSU-College of PESCAR.
Antes nakaabot sa Thailand kun sa diin nagatrabaho man siya bilang Creative Arts Teacher Specialist for Arts, Drama and Music sa isa ka international school, kilala man si Cabinos sa iya mga kontribusyon sa local theater kag bilang director kag playwright sa community productions kag street plays.
Konektado siya sa Ang Dalan Sang Krus Productions sa Leon, Iloilo kag sa WVSU Teatro Tayo sang yara siya sa kolehiyo.
“You have to keep creating, explore the world. Panumdumon naton ang simple reason why we started,” mensahe sini sa iban nga pamatan-on nga may luyag man nga malab-ot ang ila nga mga handum. “Halin kita sa pigado nga pamilya, but because of sharing kag bangud ginpadayon naton ang aton talento, nangin isa kita sa nagpakita man kun ano ang malab-utan sang aton nga talento.”
Dugang niya: “Explore yourself, explore the possibilities kung ano ang pwede mahatag sa imo sang talento mo, and ipabugal mo ina siya.”
Balantayan ang produksyon sang musical sa Nobyembre 20-22 nga gina-host sang Bangkok Community Theatre sa Bangkok Prep School Auditorium.
Ang Bangkok Community Theater amo ang pinakamalawig kag pinakadaku nga English-language community theater group sa Bangkok.#
