Ginpaandaman sang kapulisan ang publiko, ilabi na ang mga pamatan-on, nga likawan ang pagpangawat sang mga kandila, bulak kag iban pa nga mga gamit nga ginahalad sang mga pamilya sa ila nagtaliwan nga mga himata sa patyo.
Sa interview sang Bombo Radyo kay Police Captain Ryan Christ Inot, hepe sang Molo Police Station, iya ginpahayag nga mahimo pasakaan sang kaso ang mga nagapangawat sang nasambit nga mga gamit.
Apang, pagpaathag niya, magadepende man ang pagpasaka sang kaso sa reklamo kag balor sang mga butang nga ginkuha sang isa ka indibidwal.
Suno kay PCapt. Inot, sa subong nga mga tinion, wala pa sang na-report nga kaangay nga insidente sa Molo Public Cemetery
Ginapahanumdom niya ang publiko nga magpakita sang respeto sa mga pamilya nga nagabisita sa ila mga pinalangga nga napatay kag likawan ang mga aktibidad nga mahimo makagamo ukon makadisturbo sa ila.
Dugang pa sang hepe, ginapahanumduman gid ang mga publiko nga bantayan ang ila mga bag, personal nga gamit kag iban pa nga pagkabutang agud indi sila mangin biktima sang pagpangawat samtang nagabisita sa patyo kadungan sa pagsaulog sang pista minatay.
