Naga-amat-amat na subong nga adlaw, Oktubre 31, ang pagdagsa sang mga pamilya nga nagabisita sa Molo Public Cemetery agud maghalad sang bulak, magsindi sang kandila kag magdumdom sa ila mga pinalangga nga himata nga nagtaliwan na.
Sa interview sang Bombo Radyo kay Police Captain Ryan Christ Inot, hepe sang Molo Police Station, iya ginpahayag nga ginapaabot nga mas madamo pa ang magabisita sa patyo bwas nga adlaw apang, subong pa lang nga tinion naka-standby na ang mga kapulisan sa pagbantay kag pasiguro sang kalinong sa nasambit nga patyo.
Suno pa kay PCapt. Inot, ginapaandaman gid sang kapulisan ang publiko nga likawan ang pagdala sang ginadumilian nga mga gamit pareho sang armas, kutsilyo kag iban pa nga matalom nga bagay agud malikawan ang ano man nga sahi san insidente.
Ginpaandaman man niya ang mga nagabisita nga mangin mabinantayon sa ila mga personal nga gamit kasunod sang mga report nga nadula nga mga wallet kag cellphones sa palibot sang patyo.
Pagpahanumdom pa sang hepe nga magdala sang payong bangud indi mapaktan ang tyempo kun sa diin naga-ulan kag naga-init.
Dugang pa, ginapasiguro ni PCapt. Inot nga magabantay kag maga-roving ang mga kapulisan agud masiguro nga safe kag secured ang mga magabisita sa nasambit nga patyo.
