Ginapaabot sang National Grid Corporation of the Philippines (NGCP) nga mahimo magsaka ang demand sa kuryente sa Visayas sa bulan sang Nobyembre kag Disyembre bangud sa mga selebrasyon sa Christmas season lakip ang paggamit sang mga Christmas lights kag iban pa nga dekorasyon nga nagagamit sang kuryente.
Sa interview sang Bombo Radyo kay Reagahn Alcantara, Senior Officer sang NGCP, iya ginpahayag nga estable pa ang demand sa kuryente sa subong, apang padayon nga gina-monitor sang ahensya ang posibilidad sang pagtaas sini lakip ang epekto sang ginapaabot nga El Niño.
Pagpaathag ni Alcantara, ang liwat nga sunod-sunod nga mga yellow kag red alert status sa Visayas ang bangud sa pag-untat sa pag-operate sang duha ka power plant kag ang scheduled maintenance sang isa pa ka planta sa Cebu nga nagresulta sa pagkadula sang ginabulubanta 441 megawatts nga kapasidad sa Visayas grid.
Suno sa iya, target nga makabalik sa grid sa Oktubre 30 ang KSPC Unit 1, nga naka-schedule nga mag-untat para sa preventive maintenance halin sang Oktubre 10.
Samtang, ginapaabot man nga makabalik sa Oktubre 31 ang TVI Unit 1, apang wala pa sang kumpirmado nga petsa ang pagbalik sang TVI Unit 2 bangud yara pa ini sa inspection stage.
Pahayag pa ni Alcantara, may mga battery energy storage system (BESS) man nga konektado na sa grid kag yara sa testing kag commissioning stage ang mga ini.
Ginpahayag man niya nga may mga proposal na para sa bag-o nga mga power plant, apang kinahanglan nga matuman ini kag mapadasig nga mapapatindog ilabi na ang baseload power plants sa Panay agud malikawan ang kakulang sang suplay kon mag-trip off ang isa ukon duha ka dalagko nga planta.
Dugang pa niya, ang nasambit nga mga tikang ang ginahimu sang ahensya agud nga ma-cater ang kinahanglanon nga supply sang kuryente sang mga pumuluyo ilabi na subong nga tion sang paskwa.
