Nakabaton sang tig-₱10,000 nga financial assistance ang 64 ka repatriated Overseas Filipino Workers (OFWs) kag seafarers sa Iloilo City nga naapektuhan sang krisis sa Middle East, samtang ginahanda man sang siyudad ang dugang nga suporta para sa ila pangabuhian kag pagpangita sang trabaho.
Sa ikatatlo nga batch sang pagpanagtag sang assistance kahapon, Oktubre 28, 22 ka OFWs ang nakabaton sang bulig. Nauna na nga nakabaton ang 24 ka benepisyaryo sa first batch kag 18 sa second batch.
Suno kay Mayor Raisa Treñas, gilayon niya nga ginmando ang paghatag sang bulig sa mga OFWs nga nagpauli bangud sang krisis sa Middle East.
Ginpaathag man sang alkalde nga wala naghalin sa orihinal nga budget sang siyudad ang amo nga financial assistance, apang nagpangita sila sang pondo agud mabuligan ang mga naapektuhan.
Luwas sa pinansyal nga bulig, ginaplano man sang Iloilo City Government nga suportahan ang mga repatriated OFWs paagi sa livelihood assistance, skills training, pagsugod sang negosyo kag job placement.
Nagpasalig man ang Overseas Workers Welfare Administration (OWWA) nga maghatag sang counterpart assistance para sa mga OFW nga nakabaton sang bulig halin sa siyudad.
Samtang, ginpaambit ni Carla Jumento, nga nagpauli halin sa Qatar, nga gamiton niya ang iya nabaton nga kwarta para sa pagpaeskwela sang iya bata kag pagbakal sang bulong sang iya amay.
Si Cherryl Velez, nga nagpauli halin sa Kuwait, gamiton man ang assistance para sa kinahanglanon sang iya bana, samtang si Edisa Mesa sang Barangay Lanit, Jaro, nagplano nga ipanagtag ang iya nabaton sa medical expenses kag panginahanglanon sang iya kabataan.
Ginpahayag ni Treñas nga prayoridad sang siyudad ang kaluwasan sang mga OFW kag ang peace of mind sang ila mga pamilya, samtang padayon nga ginabantayan ang sitwasyon sa Middle East.
Padayon man nga magahatag sang assistance ang Iloilo City Government sa iban pa nga kwalipikado nga OFWs nga magapauli bangud sang krisis.
Text By: 𝐁𝐨𝐦𝐛𝐨 𝐂𝐲𝐫𝐞𝐧𝐞 𝐀. 𝐍𝐚𝐬𝐢𝐬
