Maga-isyu sang show cause order ang Land Transportation Office (LTO-6) batuk sa driver sang modernized jeep nga naglapas sa traffic rules.
Matandaan nga sang damlag lang nakuhaan sang isa ka motorista ang modernized jeep nga nagdiretso lang ini apisar nga pula ang traffic light sa isa ka intersection sa City Proper.
Sa interview sang Bombo Radyo kay Atty. Gaudioso Geduspan II, Regional Director sang LTO-6, iya ginpahayag nga mahimo nga mag-atubang ang driver sang kaso nga reckless driving kag disregarding traffic signs, depende sa resulta sang imbestigasyon.
Suno sa iya, ang nasambit nga modernized jeepney ang naga-operate sa idalom sang Western Visayas Transport Cooperative (WVTC).
Pahayag pa ni Atty. Geduspan nga liwat-liwat nga ginapahanumdum sang LTO-6 sa tanan nga motorista, lakip ang mga driver sang pampasahero kag pribado nga mga salakyan nga hugot nga magsunod sa traffic rules kag traffic signals bangud nga wala sang pangduha-duha ang ahensya nga magpasaka sang kaso sa mga magalapas sa layi.
Dugang pa niya, sa kada tion nga maglapas sa layi ang mga driver, nagakabutang sa peligro ang kabuhi sang publiko rason nga ginapabug-atan sang ahensya sa mga driver nga magsunod sa mga traffic rules.
