Nagadepende sa circumstances sang kamatayon sang isa ka tawo sa pagproseso kag pag-embalsamo sang iya nga lawas.
Sa interview sang Bombo Radyo kay Ardee Porras, licensed embalmer sa isa ka punerarya sa distrito sang La Paz, iya ginpaathag nga kon natural death lamang ang kinamatay sang isa ka tawo, mas simple ang proseso kag wala na kinahanglan sang espesyal nga medico-legal procedure.
Apang, kon ang kamatayon ang resulta sang aksidente, pagpangluthang ukon iban pa nga murder case, mahimo magpatigayon sang autopsy agud mahibaluan ang insakto nga cause of death sini.
Suno kay Porras, nagalab-ot isa tubtob duha ka oras ang proseso sang embaling apang nagadepende sa gihapon ini sa rason sang kamatayon sang isa ka tawo.
Ginpakigbahin man ni Porras nga iya gina-esturya ang mga patay samtang iya ini gina-embalsamo bilang pagpakita sang respeto sa mga nagtaliwan kag amo man ang pagpangamuyo agud mangin malinong na ang ila sini nga mga kalag.
Suno sa iya, iya halos 18 ka tuig nga pagserbisyo bilang licensed embalmer, isa sa mga importante nga leksyon nga iya natun-an amo ang paghatag sang pagpalangga kag pag-atipan sa pamilya kag mga abyan samtang buhi pa ang mga ini.
Pagpaathag niya, indi na mabatyagan sang mga nagtaliwan ang pagpalangga nga ginapakita sa ila kon patay na ang mga ini, gani, indi na dapat hulaton pa nga magtaliwan ang isa ka tawo antes hatagan sang bulak, ipabutyag ang pag-atipan, pagahatag sang espesyal nga pagtratar kag pagpabatyag sang pagpalangga.
Dugang pa ni Porras, samtang may tion pa nga ipakita sa imu abyan, pamilya ukon loved ones ang imu pagpalangga dapat na ini nga ipabatyag kag ipabalo sa ila kaysa maghinulsol sa ulihi.
