Ginkumpirma ni Atty. Israelito Torreon, abogado ni Senador Ronald “Bato” dela Rosa, nga wala sini ginapabay-an ang iya katungdanan sa senado sa pihak sang madugay na sini nga wala pagsulod sa iya opisina.
Suno kay Torreon, nagapabilin nga bukas kag kumnpleto sa mga tinawo ang talatapan sang senador, apang, wala ini personal nga nagakadto bangud sa posibilidad nga pag-aresto sa iya kaangot sa warrant halin sa International Criminal Court nga sa subong ginakwestyon sang Korte Suprema.
Dugang pa sini, sa idalom sang protective custody sang senado ang senador samtang ginagamit sini ang mga legal nga remedyo.
Kaangot sini, nagapangatubang si Dela Rosa sa ethics complaint bangud sa iya madugay na nga pag-absent sa trabaho, apang ginpakigbahin sang iya nga abogado nga wala ini sang may ginalapas nga patakaran sang Senado.
Nabaton sang talatapan ni Dela Rosa ang abiso nahanungod sa reklamo sadtong Nobyembre 19 kag nagahanda na ang mga ini nga magsumiter sang pormal nga sabat sa sulod sang gintalana nga tyempo.
Nahibaluan nga nagapangatubang ang senador sang mga alegasyon sang crimes against humanity kaangot sa maduguon nga kampanya batok sa droga sadtong anay administrasyon ni anay President Rodrigo Duterte, nga ginapa-imbestigaran sang ICC.














