Ginalantaw nga posible himuon nga rason ni Sen. Bato dela Rosa ang pamahog batok sa iya kahilwayan kun magsabat na ini sa ethics complaint batok sa iya natuhoy sa malawig sini nga pag-absent sa official Senate duties.
Sa interview sang Bombo Radyo kay Atty. Jeremy Moreno, Law Professor sang University of San Agustin College of Law, iya ginpahayag nga dako ang tyansa nga diri magasugod ang argumento sang senador.
Suno sa iya, ginakonsiderar nga may yara siya sang warrant of arrest gikan sa International Criminal Court (ICC) kun sa diin determinado man ang gobyerno nga i-implementar ang warrant batok kay Dela Rosa nga amo anay ang hepe sang Philippine National Police (PNP).
Apang, dugang ni Moreno, magadepende sa gihapon ang desisyon sa Senado bilang institusyon kag kun paano ini pagabatunon sang Senate Committee.
Ang grupo nga “Wag Kang KuCorrupt” movement nga ginapangunahan ni Atty. Barry Gutierrez kag UP Professor kag Former Finance USec. Cielo Magno amo ang nagduso sang nasambit nga reklamo.
Madumduman nga anum na ka bulan nga wala nagapakita si dela Rosa sa publiko pagkatapos ang “shooting” sa sulod sang Senado sang Mayo 13.
Ini ang kasunod sang eksena nga paglagsanay sang Mayo 11 matapos nga gintinguhaan siya nga arestuhon sang mga ahente sang National Bureau of Investigation (NBI).
Nahibaluan nga gindagdagan sang International Criminal Court (ICC) si Dela Rosa sang arrest warrant kaangot sa crimes against humanity case nga ginapangatubang man ni former President Rodrigo Duterte kasunod sang implementasyon sang maduguon kag kontrobersyal nga drug war.
Sa pihak nga bahin, naghatag anay ang Philippine National Police (PNP) sang ultimatum agud nga magsungka si Dela Rosa apang naglampas na ini kag wala gihapon sang tinimok-timok halin sa kampo sang senador.
Nag-anunsyo man anay ang Department of the Interior and Local Government (DILG) sang P50-million nga padya sa makabulig sa paghatag sang impormasyon agud nga madakpan si Dela Rosa.














