Ginkabig sang isa ka human rights lawyer nga isa ka porma sang self-preservation kag pagpaluya sang global justice ang deklarasyon sang mga lider sang United States, China, kag Russia nga nagakwestyon sa hurisdiksyon sang International Criminal Court (ICC).
Sa ila “Declaration Toward Peace” nga ginpagwa matapos ang Asia-Pacific Economic Cooperation Summit sa Shenzhen, ginpahayag nanday US President Donald Trump, Chinese President Xi Jinping, kag Russian President Vladimir Putin nga indi dapat pag-abusuhon sang ICC kag iban pa nga international bodies ang ila hurisdiksyon.
May yara sang 125 ka member states ang ICC, apang indi kabahin sa korte ang tatlo ka nasambit nga mga nasyon.
Sa interview sang Bombo Radyo kay Atty. Jobert Pahilga, founding member sang National Union of Peoples’ Lawyers (NUPL), iya gin-athag nga apisar nga indi state party ang tatlo sa Rome Statute, maathag nga sa subong nga panahon, ginakabig sila nga mga superpower kag pareho pa nga permanent members sang United Nations Security Council (UNSC).
Ang UNSC amo ang nagaisahanon nga United Nations (UN) organ nga may awtoridad sa pagpagwa sang mga desisyon nga legal nga obligado tumanon sang tanan nga member states.
Dugang pa ni Pahilga, may yara gihapon sang daku nga impluwensya ini nga “superpowers” sa iban nga mga nasyon ilabi na sa aspeto sang ekonomiya, politika, kag militar.
“Ang ila nga declaration is toward self-preservation and it undermines global justice. Because ICC was precisely established to give people hope and to approximate justice para sa mga tawo nga nadulaan sang pag-asa sa ila nga domestic courts,” pahayag ni Pahilga.
Dugang niya: “Although ang United Nations may ara sang General Assembly, obviously, ang pinaka-powerful nga country subong are US, China, and Russia. And if these three superpowers would speak, “everybody would listen”. Amo na nga kung mag-declare sila sang animosity toward sa ICC, ano man nga desisyon sang ICC, if it is not supported by these three superpowers, would not be implemented.”
Nahibaluan nga subject si Putin sang warrant of arrest sang ICC halin sang 2023 bangud sa alegasyon sang unlawful deportation kag unlawful transfer sang mga kabataan halin sa Ukraine.
Sang Oktubre, gindagdagan naman sang Estados Unidos sang sanctions ang ICC matapos nga una na sini nga gin-isyu man ang sanctions sa mga hukom kag prosecutor sang korte.
Nagdugang ang pagpamigos sang US matapos nga nagpagwa ang ICC sang mga warrant of arrest sang Nobyembre 2024 batok kay Israeli Prime Minister Benjamin Netanyahu kag sa anay Defense Minister sini nga si Yoav Gallant bangud sa ginatudlo nga mga war crimes sa Gaza lakip na ang paggamit sang gutom bilang pamaagi sa pagpakig-away sa gyera.
Ginkwestyon man sang US ang nauna nga imbestigasyon sang ICC sa ginatudlo nga mga krimen nga ginhimo sang mga personnel sang militar sang Amerika sa Afghanistan.#














