Nakagwa na sa presuhan ang kapin 200 ka indibidwal nga gin-aresto matapos magprotesta kadungan sang pagbukas sang 49th ASEAN Summit sa Pasay City.
Ini matapos ginmanduan sang Muntinlupa City Prosecutor’s Office nga pagwaon na ang mga ini sa presuhan.
Base sa release order nga ginpagwa, wala na sang rason nga ipatuman ang ginpangabay sang kapulisan nga sayluhon ang mga ini sa detention facility sang Bureau of Jail Management and Penology sa Camp Bagong Diwa, Taguig City.
Ginpirmahan ini ni Senior Assistant City Prosecutor Elvin Keith Barrios kag gin-aprubahan ni City Prosecutor Aileen Gutierrez.
Antes ang ila kahilwayan, nagpasaka man ang National Union of People’s Lawyers sang petisyon nga nagapangabay nga pagwaon sa presuhan ang mga gin-aresto kag pagbasura sang mga kaso nga ginapangatubang sang mga ini.
Ginpanindugan sang grupo nga paglapas sa kinamatarong sang mga nagprotesta ang padayon nga pag-detained sa ila sa sulod sang masobra 36 ka oras nga wala pa sang kaso nga ginapasaka sa korte.
Sa matandaan nga gin-aresto ang mga ini sang Nobyembre 15 matapos magprotesta batok sa ginaplano nga US-led Pax Silica initiative kag pagbisita ni US President Donald Trump sa Pilipinas.
Samtang, ginkondenar man sang Commission on Human Rights ang nasambit nga pag-aresto bangud sa mga report nga may mga menor de edad kag mga indibidwal nga nasamaran sa mga ginpangdakop.














