Nakabunggo ang isa ka truck sa poste sa Barangay Buhang, Jaro, Iloilo City subong gid lamang nga gab-i, Nobyembre 18.

Sa interview sang Bombo Radyo kay alyas Inday, residente sang lugar, iya ginpahayag nga nakibot sila sa mabaskog nga lagapok kag gilayon man nga nadula ang suplay sang kuryente sa ila lugar.

Suno sa iya, pagguwa niya sang ila balay, nakita niya ang truck nga nagbunggo na sa pader kag naipit sa tunga sang duha ka poste sang kuryente.

May karga nga mga manok ang truck nga halin sa banwa sang Leganes kag posible padulong sa distrito sang Jaro ukon sa banwa sang Pavia.

Gilayon nga nagresponde ang Iloilo City Emergency Responders (ICER) kag kapulisan kag ginhatagan sang pagbulong ang duha ka sakay sang truck.

Conscious ang duha kag nakalakat pa man suno sa mga residente matapos sila makapanaug sa truck sa bulig sang kapulisan.

Samtang, gina-contact na sang mga otoridad ang tag-iya sang truck kag ginaplano ang pagkuha sini sa lugar agud mabalik ang suplay sang kuryente sa mga residente nga naapektuhan sang insidente. (By: Bombo Ireca Faye Pioquinto)