Madugay na sa record sang Barangay Anti-Drug Abuse Council (BADAC) ang 48-anyos nga babaye nga isa sa nadakpan sa drug buy bust operation sa Zone 1, Brgy. Tacas, Jaro, Iloilo City kahapon.
Sa amo nga operasyon, na-recover ang ginapasuni shabu nga nagabug-at sang 555 gramos nga nagabalor sang P3,774,000.
Sa interview sang Bombo Radyo kay Punong Barangay Joseph Poral sang Tacas, Jaro, iya ginpahayag nga madugay na ang impormasyon nga nagaduso si alias Karen sang iligal nga droga apang wala naga-ako.
Suno kay Poral, ang isa ka bata ni alias Karen ang na-buybust man anay sang nagligad nga binulan.
Nahibaluan nga may duha pa ka upod si alias Karen nga nadakpan nga ginaalegar mga taga-Barangay San Isidro, Jaro. Isa sa ila ang ginapahayag nga graduating criminology student.
Si alias Karen ang ginapahayag nga nabaklan sang isa ka plastic sang ginapatihan shabu gamit ang P14,000 nga buybust money antes nga na-recover sa iya possession ang dugang nga items.
Nagpanguna sa operasyon ang Regional Police Drug Enforcement Unit Western Visayas.
