Nakatalana na nga mag-atubang sa Senate impeachment court subong nga adlaw Nobyembre 19 kag buwas nga adlaw ang apat ka mga testigo sang defense team ni Vice President Sara Duterte matapos ginpadala ang mga subpoena sa ila.
Lakip na diri si lawyer Rainer Dela Fuente nga maga-eksplikar natuhoy sa Anti-Money Laundering Act kag ang tatlo pa ka iban nga testigo nga magatalakay sa mga transaksyon kag registration sang Cale88 Foods Corporation.
Maga-atubang sanday Trade Undersecretary Ceferino Rodolfo, Food and Drug Administration official Pilar Marilyn Pagayunan kag Rowena Mendoza sang Center for International Expositions and Missions.
Suno sa prosecution team, kinahanglan nga maeksplikar sang defense team ang gina-alegar 818 milyon pesos kag ang unexplained wealth ni Duterte base sa mga financial records nga ginpresentar sa impeachment trial.
Nahibaluan nga ang Cale88 ang isa sa mga negosyo nga ginakwestyon sang prosekusyon matapos magpagwa sang financial records nga indi magnubo sa 319 milyon pesos ang remittances halin sa China.
Samtang, ginkwestyon man sang prosekusyon ang nangin testimoniya sang mga nauna nga testigo sang depensa bangud kulang ang mga ini agud sabton ang mga alegasyon batok sa bise presidente.
Sa pihak sini, ginpahayag sang prosekusyon nga hatagan nila sang kahigayunan ang mga nabilin nga testigo nga ma-eksplikar ang mga kwestyonable nga manggad kag transaksyon ni Duterte kag ang bana sini nga si Atty. Manases Carpio.








