Gin-deny sang Bureau of Jail Management and Penology (BJMP) ang mga nagalapta nga report nga ginpahanugutan nga makaguwa si anay House Speaker Martin Romualdez sa iya detention facility samtang patay ang mga suga agud indi makita sa CCTV cameras.
Suno kay Malacañang Press Officer Claire Castro, gin-report sang BJMP nga wala sang record sang power interruption ukon pag-untat sang operasyon sang CCTV cameras sa male dormitory sang Quezon City Jail sa sulod sang nagligad nga isa ka bulan.
Wala man suno sa BJMP sang record nga nakaguwa si Romualdez sa pasilidad sa amo nga panahon, luwas lamang sang pagtambong sini sa iya katapusan nga hearing sa Sandiganbayan sang Oktubre 12.
Samtang, nagmando na ang BJMP sang imbestigasyon agud usisaon ang nasambit nga mga alegasyon.
“Initial CCTV verification by BJMP National Headquarters showed no recorded power or CCTV interruption at the Quezon City Jail–Male Dormitory, and no recorded movement of Rep. Martin Romualdez outside the facility during the period examined,” suno kay BJMP spokesperson Jayrex Bustinera.
Ginpasiguro man sang ahensya nga pareho ang mga pagsulundan sa pagbantay sa tanan nga persons deprived of liberty kag kinahanglan ang nagakaigo nga court order antes tugutan ang bisan sin-o nga makaguwa sa detention facility.
“The BJMP reiterates that all PDL are subject to the same custodial rules and that any movement outside the jail requires a proper court order,” dugang pa sang jail bureau.#
