Nagpanawagan ang psychiatrist kag chairperson sang Drug-Free Workplace Committee sang Western Visayas Medical Center (WVMC) nga dapat balansehon ang accountability kag compassion sa pagpatuman sang Drug-Free Workplace Policy, ilabi na sa mga empleyado nga magpositibo sa drug testing.
Suno kay Dr. Donaldo Nicanor Tugbang, indi dapat penalidad lamang ang ipatuman sa mga empleyado nga magpositibo sa drug test kundi kinahanglan man nga sundon ang due process kag hatagan sila sang nagakaigo nga suporta kag paghangop.
Gin-athag sang doktor nga ang paggamit sang illegal drugs ang isa ka komplikado nga problema nga mahimo may kaangtanan sa mental kag emotional health, pressure sa trabaho, impluwensya sang palibot kag problema sa pamilya.
Bangud sini, kinahanglan ang holistic nga pag-atipan nga nagalakip sa pisikal kag mental nga kaayuhan sang empleyado paagi sa pagbuligay sang mga doktor, nurse, psychiatrist, psychologist, counselor kag social worker agud mabuligan ang ila recovery kag malikawan ang pagbalik sa paggamit sang droga.
Ginpahayag man ni Dr. Tugbang nga importante nga masiguro sang mga health facilities ang mental well-being sang ila mga empleyado agud mapabilin ang kalidad sang healthcare services kag seguridad sang mga pasyente.
Ginklaro man niya nga ang drug abuse prevention indi lamang responsibilidad sang institusyon paagi sa mga polisiya kag programa, kundi responsibilidad man sang kada empleyado nga amligan ang iya lawas kag panghunahuna kag maglikaw sa illegal drugs kag iban pa nga makahalalit nga substances.













