Naghatag ang Iloilo Provincial Government sang nagabalor sa ₱48.214 million nga agricultural projects kag farm machineries sa nagkalain-lain nga banwa sa probinsya agud mapabakod ang agricultural productivity kag mabuligan ang mga mangunguma nga maatubang ang epekto sang El Niño phenomenon.

Ginhimo ang turnover ceremony subong, Nobyembre 19, 2026 sa Capitol lobby, nga nagalakip sang infrastructure projects, irrigation facilities kag farm equipment nga ginalauman nga makabulig sa pag-atubang sang prolonged dry spells ukon malawig nga tion sang tig-ilinit kag kakulang sang ulan.

Lakip sa mga assistance nga ginhatag ang 12 ka units sang flatbed dryers nga nagabalor ₱12.277 million, 10 ka small farm reservoirs nga nagabalor ₱991,500, kag tatlo ka Small-Scale Irrigation Projects ukon SSIP nga nagabalor ₱3.401 million.

May yara man sang rice mill nga nagabalor ₱3.014 million, road-opening project sa Barangay Aguingay, Janiuay nga nagabalor ₱6.570 million, kag duha ka greenhouse projects nga nagabalor ₱2 million.

May yara man sang pagatukuron nga duha ka warehouses nga nagabalor ₱10 million, apat ka cultivators nga nagabalor ₱894,000, 10 ka hand tractors nga nagabalor ₱1.740 million, kag 49 ka solar-powered pump irrigation units nga nagabalor ₱7.325 million.

Suno kay Acting Provincial Agriculturist Geron Magbanua, padayon nga ginapabakod sang provincial government ang agriculture sector pinaagi sa investments sa modern farming technologies kag support facilities.

Importante suno kay Magbanua ang paghatag sang post-harvest facilities, mechanization kag irrigation systems bangud nagabulig ini sa pag-improve sang agricultural production.

Nagpanguna sa turnover ceremony sanday Vice Governor Lee Ann Debuque; Board Member Rolito Cajilig, chairperson sang Sangguniang Panlalawigan Committee on Agriculture; kag Board Members Rica Jane Garin, Jo Ann Germinanda, kag Rolando Distura.

By: Bombo Lynd-C Bade