Nagpabor ang Department of Budget and Management (DBM) kag mga local government leagues sa Pilipinas nga magabuligay sa pagpadasig sang local development projects kag i-address ang mga concerns sa 2026 Collective Negotiation Agreement (CNA) Incentive requirements.

Ang agreement natabo sa pagsinapol sa tunga ni DBM Secretary Kim Robert C. De Leon kag mga tiglawas sang League of Municipalities of the Philippines (LMP), League of Cities of the Philippines (LCP), League of Provinces of the Philippines (LPP), kag Union of Local Authorities of the Philippines (ULAP) subong nga adlaw.

Sa joint statement, gin-athag sang DBM nga ang CNA Incentive ang indi automatic nga bonus para sa government employees.

Ini isa ka performance-based reward nga ginahatag bilang pagkilala sa pagpanikasog sang mga empleyado nga malab-ot ang office targets, ma-improve ang mga serbisyo, kag paggamit sang pondo sang gobyerno sang insakto.

Sa idalom sang 2026 guidelines, gina-obliga ang local government units (LGUs) sang indi magnubo sa 75 percent sang ila approved budget para sa 20 percent Development Fund as of September 30, 2026, bilang isa sa mga requirements para sa CNA Incentive.

Apang, ginkilala man sang DBM ang concerns sang LGUs nga napaslawan nga malab-ot ang 75 percent requirement bangud sa procurement delays, failed bidding, kalamidad, kag iban pa nga problema nga wala na sa kontrol sang mga empleyado.

Agud masolusyonan ang ini nga concerns, ang DBM kag ang LGU leagues nagpabor nga magpatigayon sang review process para sa mga apektado nga local governments.

Ang mga concerned LGUs dapat nga magpasa sang mga dokumento nga nagapaathag sang rason sang pagka-delay, upod ang updated reports sang proyekto kag plano.

Ang DBM amo ang ma-review sang explanations kag efforts depende sa sitwasyon.

Apang, gin-athag sang ahensya nga ang pagkompleto sang proyekto pagkatapos sang Setyembre 30, 2026, indi automatic nga makagarantiya sang eligibility para sa CNA incentive.

Gina-remind sang DBM ang mga LGUs sang ila responsibilidad sa idalom sang Section 287 sang Republic Act 7160, ukon ang Local Government Code of 1991, nga nagabutang sang indi magnubo sa 20 percent sang ila annual National Tax Allotment (NTA) para sa local development projects.

by: Bombo Lynd-C Bade