Hugot nga nagpanindugan si Committee on Health Chairperson City Councilor Alan Zaldivar sa pagdumili sa pagbaligya sang ‘tingi-tingi’ nga sigarilyo ukon ginkuha sa original packaging, agud protektahan ang ikaayong lawas sang mga kabataan.
Sa interview kay Zaldivar, ang amo nga tikang base sa mandato sang Republic Act 11223 ukon ang Universal Health Care Act kag Republic Act 10643 ukon ang Graphic Health Warning Law.
Suno sa iya, kung ang mga sigarilyo ginabaligya nga ginakuha sa ila orihinal nga pakete, nalapas sini ang katuyuan sang laye nga mapahibalo ang tawo pinaagi sa mga graphic health warnings.
Bisan pa naintindihan sang gobyerno ang sentimyento kag sentro sang negosyo sang mga sektor nga apektado, gin-insister ni Zaldivar nga mas nagapangibabaw ang ikaayong lawas kag ang malimpyo nga palibot para sa mga pumuluyo, ilabi na sa mga pamatan-on.
”It’s not only one commodity ang ginabaligya sa sari-sari store. A lot of things inside nga pwede mabakal sang mga pumuluyo except sa sigarilyo,” pahayag ni Zaldivar.
Ginpahayag man niya nga base sa mga datos, ang mataas nga porsyento sang mga naga-panigarilyo ang makita sa bracket sang mga pamatan-on, rason nga kinahanglan gid ang hugot nga pagpatuman sang Clean Air Act kag sang ordinansa sa siyudad.
Madumduman nga nagpahayag si Iloilo City Anti-Smoking Task Force (ICAST) Director Iñigo Garingalao nga hugot na ipatuman ang pagdumili sa pagbaligya sang ‘tingi-tingi’ nga sigarilyo pagsampot sang tuig 2027.
Text 𝐁𝐲: 𝐁𝐨𝐦𝐛𝐨 𝐂𝐲𝐫𝐞𝐧𝐞 𝐀. 𝐍𝐚𝐬𝐢𝐬













