Gintumod nga kanal ang posible nga source sang kontaminasyon sa tatlo ka shallow wells sa Barangay Zamora-Melliza, Iloilo City, matapos makit-an nga may discoloration ang tubig sa duha ka pribado kag isa ka communal well.
Ini ang ginpaathag matapos nagdeploy ang General Services Office (GSO) sang team agud i-validate ang mga report sang kontaminasyon nga una nga gin-angot sa epekto sang El Niño.
Sa interview kay GSO Head Engineer Neil Ravena, iya ginpahayag nga ginkuha-an sang water samples ang tatlo ka shallow wells kag ginpa-laboratory test agud mahibaluan ang source sang kontaminasyon kag kung luwas pa ini nga gamiton.
Sa pag-usisa, nakita nga posible nga ang kontaminado nga tubig halin sa kanal ang nag-seep-in ukon nakasulod sa mga shallow wells.
Bangud sini, ginlimpyuhan sang barangay kag mga pumuluyo ang palibot kag gin-declog ang drainage system.
Sa pagbalik sang GSO team, nag-improve naman ang color sang tubig, apang nagkuha liwat ini sang samples bangud kinahanglan pa nga ma-chlorinate ang mga shallow wells antes makasiguro nga luwas na ini gamiton.
Sa karon, padayon ang chlorination kag pagsag-a ukon paglimpyo sang mga bubon samtang ginahulat ang resulta sang laboratory test nga amo ang magadeterminar kung mahimo pa ini gamiton ukon kinahanglan na nga i-condemn.
Ginpahayag man ni Ravena nga isa sa mga rason sang kontaminasyon sang shallow wells amo ang indi insakto nga distansya sang bubon sa septic tank, nga dapat may yara sang ginabanta 25 metros nga separation agud malikawan ang pagsulod sang contaminants.
Mas daku ang posibilidad sini sa mga lugar nga high-density ang populasyon, diin may mga kaso man sang pagkakita sang E. coli sa tubig.
Samtang, 25 ka barangay ang ginaprioridad sa padayon nga monitoring sang GSO, nga may duha ka team nga gin-deploy, bisan pa nga nagalab-ot sa sobra 1,000 ang kabug-usan nga shallow wells sa siyudad.
Text by: Bombo Cyrene Nasis














