Padayon nga gina-monitor sang City General Services Office ang bubon sang Brgy. Zamora, Melliza pagkatapos gintumod nga ang kanal amo ang posible nga rason sang contamination.
Sa interview sang Bombo Radyo kay Engr. Neil Ravena, head sang City General Services Office, may yara sang duha ka pribado kag isa ka communal well nga ginkuhaan sang samples kag ginpaidalom sa laboratory test.
Ini agud mahibaluan ang source sang contamination kag kun luwas man ini nga gamiton sang pumuluyo.
Dugang pa ni Ravena, posible nga halin sa kanal ang tubig nga nakasulod sa shallow well kag naka-contaminate sa malimpyo nga tubig nga ginagamit sang mga residente.
Gindetalye man ni Ravena nga indi insakto ang distansya sang bubon sa septic tank, rason nga posible nag-ilig ang mahigko nga tubig sa shallow well.
Sa subong, padayon sa gihapon ang operasyon sang City General Services Office kag may yara naman sang gamay nga improvement matapos ang pag-chlorinate sa bubon apang kinahanglan sa gihapon siguruhon kun luwas gamiton ang tubig.









