Kilala nga masabad kag nagapalupok sang armas kun nakainom ang suspek nga nagtiro-patay sa Deputy Tanod Commander sang Barangay Cubay, Jaro.
Sa interview sang Bombo Radyo kay alyas ‘Marich’, ang birthday celebrant nga hinablos man sang suspek, iya ginpahayag nga ginsaway kag ginhangkat sang inaway sang suspek ang mga bisita bangud tuman sila kagahod.
Ini ang rason nga may nakompronta siya nga isa ka tawo kun sa diin nasumbagan siya kag nalipong.
Sang siya naumpawan, gilayon ini nga nagkuha sang iya armas kag ginpangtayaan ang mga tawo sa iya palibot.
Pahayag pa ni ‘Marich’, gin-agawan sang tatlo ka tanod sang armas ang iya tiyo kun sa diin didto na nila nabatian ang apat ka lupok.
Diri na nakit-an nga naigo ang biktima nga isa sa mga nagpugong kag nang-agaw sang armas sang suspek.
Gilayon man nga gindala sa ospital ang biktima, apang gindeklarar ini nga dead on arrival.
Sa subong, yara na sa kustodiya sang kapulisan ang suspek pagkatapos siya nga ginsurrender sang mga tanod.














