May pila ka mga adjustments nga pagahimuon sa Kasadyahan sa Kabanwahanan 2027 bangud sa mga na dugang kag nagbalalik nga mga banwa.
Sa pahayag ni Aulyn Yue Sin, Officer sang Iloilo Provincial Tourism Office, bangud sa nagdamo na ang mga partisipante, ibalik na nila ang lima ka mga judging areas kumparar sang nagligad nga tuig nga duha lang.
Ang nasambit nga aktibidad isa ka carousel type, gani tinguhaan nila nga makaumpisa alas dos sa hapon kag magatakop alas sais y media sa gab-i.
Dugang pa niya, indi cash prize ang ginalagas sang mga kabanwahanan kundi dungog kag bugal.
Nagpabutyag naman ang pila ka mga alkalde sang ila panimuot kun ano ang ila preparasyon para sa gina-antisipar nga aktibidad.
Sa pahayag ni Badiangan Mayor Suzette Mamon, isa sa mga rason sang pagbalik nila amo ang nakita nila nga “Art in Bolo Making” ukon binangon nga mapadayaw gid nila sa bilog nga kalibutan.
Ginpabutyag man ni San Joaquin Mayor Joe Abad Lazaro Jr. nga sang tion nga napinsaran pa lang nila nga magpartisipar, daog na sila bangud mapaambit nila ang ila kultura, tradisyon, kag turismo.














