Tinutuyo ni Iloilo City Mayor Raisa Treñas nga himuon kada tatlo ka bulan ukon quarterly ang drug testing sa mga empleyado sang Iloilo City Government agud mapabaskog ang kampanya para sa drug-cleared workplace.
Ini kasunod sang pagkadakop sang ginapahayag High Value Individual (HVI) nga job hire employee sang siyudad sa drug buy-bust operation sa Zone 1, Barangay Gustilo, La Paz sang Nobyembre 13.
Suno kay Mayor Treñas, gindiscuss na niya ang insidente kay Executive Assistant Victor Gelvezon nga amo ang nagadumala sang drug-clearing efforts sang siyudad.
Pahayag ni Treñas, nagapadayon ang drug-clearing initiatives indi lamang sa mga barangay kundi lakip na mismo sa City Hall.
Ginpahayag man sini nga kapin na sa 500 ka city government employees ang una na nga ginpaidalom sa drug testing, apang bangud sa natabo nga insidente, ginakonsiderar nila nga himuon ini kada tatlo ka bulan agud malikawan ang pagsulit sang kaangay nga kaso.
“Siguro we have to make it quarterly because what happened here is very random para hindi na maliwat,” suno kay Treñas.
Dugang pa niya, handum sang administrasyon nga masiguro nga drug-cleared ang workplace sang City Hall kag mangin drug-free ang bug-os nga Iloilo City.
Text by: Bombo Cyrene Nasis












