Nagpaandam ang Iloilo Provincial Health Office sa publiko nga indi magkumpiyansa kun magnubo ang hilanat sa ika-tatlo nga adlaw pataas bangud mas delikado ini nga senyales sang dengue.

Sa interview sang Bombo Radyo kay Dr. Maria Socorro Quiñon, head sang Iloilo Provincial Health Office, iya ginpahayag nga ang dengue may yara sang stages kun sa diin ang una nga stage amo ang ginatawag nga febrile stage.

Sa nasambit nga stage, sa una tubtob ikatlo nga adlaw, tuman gid kataas ang hilanat sang pasyente nga may dengue.

Pagkatapos sang una nga stage, masunod naman ang afebrile stage kun sa diin nagapanubo ukon nagakadula na ang hilanat sa pasyente, apang amo man ini nga stage ang balantayan bangud amo ini ang crucial kag diri nagaumpisa ang hypotension kun sa diin may bleeding ukon pagdugo.

Sa nasambit nga stage, dapat dal-on sa ospital ang pasyente agud ma-amligan kag ma-monitor ang iya kahimtangan.

Nagpaambit man si Dr. Quiñon nga dapat gilayon nga mangita sang nagakaangay nga pagbulong kun may manotisyaran na nga sintomas sang dengue.

Labi nga ginpaandaman ni Dr. Quiñon amo ang mga kabataan bangud manubo ang flight range sang lamok, rason nga mas nangin prone sila sa dengue.

Pahayag pa ni Dr. Quiñon, para makalikaw sa dengue, magsunod gid sa self protection measures kag magpalapit sa tagsa ka mga local government units agud mahatagan sang nagakaangay nga bulig kun may dengue outbreak.