Naglab-ot na sa malapit 12, 000 ang narecord nga kaso sang leptospirosis sa pungsod subong nga tuig tubtob Setyembre 23 suno sa Department of Health.
Mas mataas ini sang 46% kun ikumpara sa masobra 8, 000 nga kaso nga nrecord sang kaangay nga petsa sang nagligad nga tuig.
Samtang, mas manubo naman ang numero sang dengue subong nga tuig.
Naka-record ang DOH sang masobra 168, 000 nga kaso sang dengue ukon 30% nga mas manubo kumpara sa kapareho nga tion sang nagligad nga tuig.
Suno sa ahensya, nakahanda ang nagakaigo nga suplay sang bulong para sa mga pasyente nga may ara sang leptospirosis.
Napanagtag naman ang mga bulong sa mga nagkalain-lain nga bahin sang pungsod, umpisa sang nagsugod ang tag-ululan.
Padayon naman nga gina-engganyo sang DOH ang publiko nga gilayon nga magpakonsulta sa doctor kun maka-eksperiensya sang sintomas kaangay sang hilanat kag tuman nga pagpalanakit sang kalawasan ilabi na kun naglusong sa baha.
Nagapangabay naman ang DOH sa publiko nga ipabilin ang malimpyo nga palibot agud malikawan ang paglapta sang sakit.
